2Cor 6 | AAK | STEP | Ámá xí̵o tí̵nɨ nawínɨ gwiaumí̵ inɨpí̵rɨ nánɨ o tí̵nɨ nawínɨ yarɨŋwáone eŋagwɨ nánɨ eŋí̵ rɨre'mɨxí̵ nɨseairɨrɨ rɨpɨ osearaneyɨ, “Gorɨxo wá seawianɨŋí̵yí̵ne' xe surí̵má oneaímeanɨrɨ mepanɨ.” osearaneyɨ.

2 Corinthians 6

Wáí̵ wurɨmeiarɨgí̵áwamɨ wímeaarɨŋí̵pɨ nánɨrɨnɨ.

1 Ámá xí̵o tí̵nɨ nawínɨ gwiaumí̵ inɨpí̵rɨ nánɨ o tí̵nɨ nawínɨ yarɨŋwáone eŋagwɨ nánɨ eŋí̵ rɨre'mɨxí̵ nɨseairɨrɨ rɨpɨ osearaneyɨ, “Gorɨxo wá seawianɨŋí̵yí̵ne' xe surí̵má oneaímeanɨrɨ mepanɨ.” osearaneyɨ. 2 Ayí̵ Bɨkwí̵yo rɨpɨ nɨrɨnɨrɨ eánɨŋagɨ nánɨ seararɨŋwɨnɨ, “Gorɨxonɨ rɨxɨŋí̵ seyí̵ne' nɨrarɨgí̵ápɨ arí̵á seaipaxíná rɨxa arí̵á seaiŋanigɨnɨ. Sí̵á ámáyí̵ne' yeáyí̵ seayimɨxemeámí̵a nánɨ imónáná rɨxa arɨrá seaiŋanigɨnɨ.” Apɨ Bɨkwí̵yo nɨrɨnɨrɨ eánɨŋagɨ nánɨ píránɨŋí̵ arí̵á ókiarí̵ nɨmóní̵poyɨ. Gorɨxo arí̵á neaipaxíná, ayí̵ rínárɨnɨ. Sí̵á o yeáyí̵ neayimɨxemeaní̵a nánɨ imónɨŋí̵yi, ayí̵ rɨyirɨnɨ. Ayɨnánɨ “Gorɨxo wá nɨneawianɨrɨ neaiiŋí̵pɨ xe surí̵má oneaímeanɨrɨ mepanɨ.” seararɨŋwɨnɨ. 3 Wáí̵ wurɨmeiarɨŋwáone nemerane'ná negí̵ yarɨŋwápɨ nánɨ xwɨyí̵á mɨneamearɨpaxí̵ oimónaneyɨnɨrɨ ámá none yarɨŋagwɨ sɨŋwí̵ nɨneanɨróná óreámioapaxí̵ imónɨŋí̵pɨ bɨ yarɨŋagwɨ sɨŋwí̵ mɨneanɨpa oe'poyɨnɨrɨ anɨŋí̵ miní̵ yarɨŋwárɨnɨ. 4 Pí pí nerane'ná “Ámá awa Gorɨxomɨ xɨnáíwánɨŋí̵ nimónɨro píránɨŋí̵ omɨŋí̵ wiiarɨgí̵áwarí̵anɨ?” oneaiaiwípoyɨnɨrɨ yarɨŋwárɨnɨ. E nerane'ná pí pí xeanɨŋí̵ neaímeáí̵pɨ xwámámí̵ wirane anɨŋí̵ neainɨpaxí̵ imónɨŋí̵ neaímeaarɨŋí̵pɨ xwámámí̵ wirane dɨŋí̵ rí̵á neawepaxí̵ imónɨŋí̵pɨ xwámámí̵ wirane yarɨŋwárɨnɨ. 5 Iwaŋí̵ neame'pearí̵náranɨ, gwí̵ aŋí̵yo neaŋwɨrárarí̵náranɨ, sɨpí owikárí̵poyɨnɨrɨ sí̵mí̵ráxwɨró yarɨgí̵áyí̵ ɨkwɨkwierí̵ ninɨro neaiarí̵náranɨ, xwámámí̵ wiarɨŋwárɨnɨ. Omɨŋí̵ anɨŋí̵ miní̵ okɨŋí̵ tí̵nɨ erane eŋwáonerɨnɨ. Si rorane agwí̵nɨ erane eŋwáonerɨnɨ. 6 None nánɨ “Awa Gorɨxomɨ xɨnáíwánɨŋí̵ nimónɨro píránɨŋí̵ omɨŋí̵ yarɨgí̵áwarí̵anɨ?” oneaiaiwípoyɨnɨrɨ rɨpɨ enɨ yarɨŋwárɨnɨ. Íkwɨráí̵nánɨŋí̵ nimónɨrɨ erane nepaxɨŋí̵pɨ nánɨ nɨjí̵á imónɨrane sanɨŋí̵ imónɨrane wá nɨwumɨxɨrane arɨrá wirane Gorɨxoyá kwíyí̵ neaaíní̵í̵pimɨ dánɨ erane mimóní̵ imónɨŋí̵pɨ mɨwíwapɨyí ámáyo nepa dɨŋí̵ sɨpí nɨwirane erane 7 xwɨyí̵á nepaxɨŋí̵ imónɨŋí̵pɨ yaŋí̵ urɨrane eŋí̵ eánɨŋí̵ Gorɨxo neaimɨxí̵í̵pimɨ dánɨ erane yarɨŋwárɨnɨ. Ámá mɨxí̵ nánɨ imónɨŋí̵pɨ í̵á xɨrarɨgí̵ápa none nemerane'ná we' rónɨŋí̵ yarɨŋwápɨ wí̵á tɨnaní̵wá nánɨ we' onamɨŋu' tí̵nɨ í̵á xɨrɨrane xɨxe mɨxí̵ wianí̵wá nánɨ we' náu' tí̵nɨ í̵á xɨrɨrane yarɨŋwáonerɨnɨ. 8 Wí yayí̵ neamero wí paimamí̵ neairo neaiarɨgí̵onerɨnɨ. Wí none nánɨ repɨyí̵ nɨwiróná “Sɨpí yarɨgí̵áwarɨnɨ.” urɨro wí “Naŋí̵ yarɨgí̵áwarɨnɨ.” urɨro yarɨgí̵onerɨnɨ. Nepánɨ yarɨŋwáone aiwɨ wí “Yapí̵ neaiepɨsarɨgí̵áwarí̵anɨ?” neaiaiwiarɨgí̵árɨnɨ. 9 None nánɨ wí “Porowa gowarí̵anɨ? ‘Awa nánɨ ámá obaxí̵ nɨjí̵á imónɨŋoɨ.’ rɨseaimónarɨnɨ?” rarɨŋagí̵a aí ámá obaxí̵ none nánɨ nepa nɨjí̵á imónɨŋoɨ. None amɨ amɨ nemerane'ná yoí̵ mayí̵ nimónɨrane aí sɨnɨ ŋweaŋwɨnɨ. Sɨyikí̵ neaeaarɨgí̵one imónɨŋagwɨ aiwɨ sɨnɨ wí mɨneapɨkigí̵onerɨnɨ. 10 Íkí̵nɨŋí̵ sɨpí neaiarɨŋagɨ aiwɨ íníná dɨŋí̵ nií̵á neainarɨŋí̵rɨnɨ. “Awa amɨpí nánɨ dí̵wí̵ ikeamónɨgí̵áwarí̵anɨ?” neaiaiwiarɨŋagí̵a aí none xwɨyí̵á yayí̵ neainarɨŋí̵pɨ wáí̵ urarí̵ná ámá obaxí̵ arí̵á neairɨŋí̵pimɨ dánɨ Kiraiso tí̵nɨ nawínɨ nikárɨnɨro nánɨ amɨpí mɨmu'rónɨgí̵áyí̵ yapɨ imónarɨgí̵árɨnɨ. “Amɨpí bɨ í̵á mɨmaxɨrɨgí̵áwarɨnɨ.” neaiaiwiarɨŋagí̵a aí amɨpí Kiraiso neaiiŋí̵pɨ bɨ mɨneamu'roŋonerɨnɨ.

“Sɨŋánɨ seararɨŋwá eŋagwɨ nánɨ seyí̵ne' enɨ xɨxenɨ neaiípoyɨ.” urɨŋí̵ nánɨrɨnɨ.

11 Korinɨyo ŋweáyí̵ne', apɨ apɨ nɨseara nurane'ná yumí̵í bɨ mɨseaí sɨŋánɨ rí̵wárɨnɨ. E nɨsearɨrane'ná seyí̵ne' dɨŋí̵ sɨxí̵ seayiŋwáone sɨwánɨŋí̵ seainí̵wárɨnɨ. 12 None dɨŋí̵ sɨxí̵ muyipa oyaneyɨnɨrɨ wí e'wáonemanɨ. Sewanɨŋí̵yí̵ne' awamɨ dɨŋí̵ sɨxí̵ muyipa oyaneyɨnɨrɨ e'í̵á eŋagɨ nánɨ nawínɨ mimónɨŋwɨnɨ. 13 Ayɨnánɨ xanonɨ gí̵ niaíwí̵yo urɨpaxí̵ rɨpɨ osearɨmɨnɨ, “Xɨxe oinaneyɨ. None dɨŋí̵ sɨxí̵ seayarɨŋwápa seyí̵ne' enɨ neayípoyɨ.” osearɨmɨnɨ.

“Dɨŋí̵ mɨwɨkwí̵rogí̵áyí̵ tí̵nɨ gwí̵ mɨmónɨpanɨ.” urɨŋí̵ nánɨrɨnɨ.

14 Jisasomɨ dɨŋí̵ mɨwɨkwí̵roarɨgí̵áyí̵ tí̵nɨ wigí̵ yarɨgí̵ápɨ oyaneyɨnɨrɨ wí gwí̵ mɨmónɨpanɨ. Ayí̵ rɨpɨ nánɨ seararɨŋɨnɨ. “Ámá we' rónɨŋí̵ imónɨŋí̵pɨnɨ yarɨgí̵áyí̵ tí̵nɨ maŋí̵ wiaíkiarɨgí̵áyí̵ tí̵nɨ axí̵pɨnɨ epí̵rí̵a nánɨ imónɨpaxí̵ imónɨnɨ.” rɨseaimónarɨnɨ? “Axíná wí̵á ónɨrɨ sí̵á yinɨrɨ epaxí̵rɨnɨ.” rɨseaimónarɨnɨ? 15 “Kiraiso tí̵nɨ Obo tí̵nɨ dɨŋí̵ axí̵pɨnɨ xɨrɨŋiɨ.” rɨseaimónarɨnɨ? “Kiraisomɨ dɨŋí̵ wɨkwí̵rogí̵áyí̵ dɨŋí̵ moro dɨŋí̵ mɨwɨkwí̵rogí̵áyí̵ dɨŋí̵ moro neróná axí̵pɨ bɨ mopaxí̵rɨnɨ.” rɨseaimónarɨnɨ? 16 “Gorɨxoyá aŋí̵ ŋwí̵á —Iwámɨ dánɨ nene yayí̵ umearɨŋwáiwárɨnɨ. Iwá tí̵nɨ ŋwí̵á ámá meŋweaarɨgí̵ápɨ tí̵nɨ ananɨ axí̵ e kumɨxárɨpaxí̵rɨnɨ.” rɨseaimónarɨnɨ? Oweoɨ, nene Ŋwí̵á anɨŋí̵ sɨŋí̵ imónɨŋoyá aŋí̵ ŋwí̵áiwánɨŋí̵ imónɨŋagwɨ nánɨ wí e yaiwipaxí̵manɨ. Nionɨ seararɨŋápɨ Gorɨxo xewanɨŋo rɨŋí̵ rɨpɨ tí̵nɨ xɨxenɨ seararɨŋɨnɨ, “Nionɨ gí̵ ámáyí̵ tí̵nɨ nawínɨ darónɨmí̵árɨnɨ. Nionɨ wigí̵ Ŋwí̵áonɨ imónɨŋáná ayí̵ gí̵ ámáyí̵ imónɨpí̵rí̵árɨnɨ.” Ámɨnáo e nɨrɨrɨ nánɨ 17 ámá xegí̵ imónɨgí̵áyo rɨpɨ enɨ urɨŋí̵rɨnɨ, “ ‘Ámá Gorɨxonɨ dɨŋí̵ mɨnɨkwí̵ró wigí̵ ŋwí̵áyo xí̵darɨgí̵áyí̵ tí̵ŋí̵ e dánɨ nɨmɨxeámɨnɨmɨ xegí̵ bɨ imónɨgí̵áyí̵ne' imóní̵í̵rɨxɨnɨ.’ Ámɨnáonɨ e seararɨŋɨnɨ. ‘Wigí̵ ŋwí̵á imónɨŋí̵pimɨ —Apimɨ dánɨ piaxí̵ seaeánɨpaxí̵ imónɨŋí̵pimɨrɨnɨ. Apimɨ bɨ onɨmiá amáí̵ mɨróní̵ anɨŋí̵nɨ we' í̵á ayɨmeae'ní̵í̵rɨxɨnɨ. Seyí̵ne' e nerónáyí̵, nionɨ ananɨ seamímɨnɨmí̵árɨnɨ. 18 Nionɨ segí̵ áponɨ imónɨŋáná seyí̵ne' gí̵ niaíwí̵ oxoyí̵ne' imónɨro niaíwí̵ apɨxíwayí̵ne' imónɨro epí̵rí̵árɨnɨ.’ Ámɨnáonɨ —Nionɨ eŋí̵ eánɨgí̵á nɨyonɨ seáyɨ e wimónɨŋáonɨrɨnɨ. Nionɨ e rarɨŋɨnɨ.” Xwɨyí̵á apɨ Bɨkwí̵yo nɨrɨnɨrɨ eánɨŋagɨ nánɨ “Jisasomɨ dɨŋí̵ mɨwɨkwí̵roarɨgí̵áyí̵ tí̵nɨ wigí̵ yarɨgí̵ápɨ oyaneyɨnɨrɨ wí gwí̵ mɨmónɨpanɨ.” seararɨŋɨnɨ.